esfr

Pertsona libre, eskubidez berdin eta elkartasunez lotuen arteko bilera, plaza hutsean.

Plaza hutsa abiatuko da Ipar Euskal Herrian

iparraldea | 2019-02-26

BURUJABETZA ETA EKONOMIA SOZIALA ETA ERALDATZAILEA

Plaza Hutsa: martxoaren 9an, 9’00etatik-12’00etara, Baionan, Eusko Ikaskuntzaren egoitzan.

Eukal Herri osoan praktika eta dinamika alternatibo asko martxan daude ; horietako frango ekonomia soziala eta eraldatzailearen esparruan kokatzen direlarik. Praktika eta dinamika alternatibo horiek gaurko sistema neo-liberalaren logikari bizkarra ematen dioten bizi-eremu konkretuak antolatzen dituzte, gisa hortan, Euskal Herrian burujabetzaren bidean urrats praktikoak konfiguratuz.

Hiru eremu aztertuko ditugu, bakoitzean dauden ekimen zehatzei erreparatuz :

Elikadura burujabetza : EHan martxan dauden esperientzi konkretu ezberdinak aztergai : lekuko hornikuntza egiturak, tokiko ekoizpen ekimenak, lurraren zaintza dinamikak…

Burujabetza energetikoa : Iener eta Enargia proiektua, Ibai-Errekak elkartea,..

Moneta eta finantza burujabetza : euskoa, Koop 57 eta Herrikoa…

Ekimen bakoitza zertan da ? Aitzina egiteko nun ikusten ditu heldu-lekuak, baina ere oztopoak ? Nolako harremanak ditu instituzioekin, eta bereziki herriko etxeekin ? Zein dira Ipar eta Hego Euskal Herriaren arteko harreman eta elkar-lan esparruak?...

Tailerraren bukaeran, zintzur-bustitze bat eskainia izanen da.

Izen ematea hemen.

 

 

Plaza Hutsa Bizkaia metropolitanoan

metropolia | 2019-01-11

Pertsona libre, eskubidez berdin eta elkartasunez lotuen arteko bilera, plaza hutsean. 

Plaza hutsa ekimen ireki bat da. Euskal Herriak arnasaldi berri bat behar duela uste duen edozeinena, herri gisa pentsatu eta bizitzeko urgentzia partekatzen dugunona. Begirada asko nahasi nahi dituena, herrigintza aro berri bat pentsatu eta gorpuzteko ahaleginari ekarpena egin nahi diona. Gogoetarako eta ekintzailetzarako espazio parte-hartzailea da, nora eramango gaituen ez dakigun bide bat, elkar hartzeko aitzakia bat gehiago.

Ezkerrekoak eta abertzaleak gara ekimen honen sustatzaileak, antzeko kezka, ilusio, neke eta esperantzekin gabiltzanak. Herrigintza aro oparo bati ekarpena egin dion komunitate baten kide sentitzen garenak aldez edo moldez. Mundua zabortegi erraldoi bat den garaiotan justiziarekin eta askatasunarekin amets egiten jarraitzen dugunak; eta nork beretik, modu askotara, amets horren alde borrokatzen dugunak.

Norabide horretan, eta,  bideari ekarpena egiteko asmoz, proposamen berri bat eskaintzen dugu: herrigintza aro berri baterako oinarrietan sakontzeko euskal metropolian, Bizkaia Metropolitanoan. Hausnarketa kolektibotik abiatuko den ariketa izango da, elementu bereizgarriak eta propioak aintzat hartuko dituena. 

Izan ere, hiriaren errealitatea nabarmen aldatu da: Lanaren konposizioa, espazio publikoak bizitzeko baldintzak, harreman sozialak garatzeko eta izateko forma ezberdinak, kultura ulertzeko forma anitzak, euskal identitatea adierazteko formula urbano berrituak, prekarietate orokortua... aldagai guzti horiek politika ulertzeko eta politika egiteko era aldatu dute. Eta herrigintza aldaketa politiko eta sozialaren motorra izanik, euskal metropoli askea eta askatzailea eraikitzeko tresna bilakatzen zaigu, halabeharrez. 

Guzti honetaz eta gehiagotaz aritzeko, datorren otsailaren 8 eta 9an Plaza Hutsa BM (Bizkaia Metropolitanoa) egingo dugu Bilbon eta Portugaleteko Merkatuan, hurrenez hurren. 

Ekimenaren nondik norako guztiak partekatzeko, urtarrilaren 23an (asteazkena) arratsaldeko 19,30etan Bilboko BIRAn aurkezpen ekitaldia egingo dugu eta bertan parte-hartzera gonbidatuak zaudete.  

PH tailerrean lantzeko oinarriak

hezkuntza | 2018-12-28

Atxikitako dokumentua urtarrilaren 12ko Plaza hutsa tailerrean landuko da, tailerraren bigarren zatiko talde-ariketan.

Euskalduntzean aurrera

euskara | 2018-12-14

Euskalduntze prozesuaren fase oso batek sabaia jo du. Asko aurreratu da, asko egin da. Baina, orain, oso momentu berezian aurkitzen gara: euskararen erabilerak azken hamarraldietan ezagutu duen goranzko joera eten egin da, eta beheranzko joera horrek hala segiko du hizkuntza politiketan eta euskararen aldeko langintza soziopolitikoan jauzi bat eman ezean. Belaunaldi honek hartzen dituen hizkuntz-jarreren eta datozen urteetan herri gisa egiteko gai garenaren araberakoa izango da euskararen etorkizuna.

Aktibazio handia antzematen da euskalgintzan, bai gogoetari dagokionez eta bai ekintzailetzari dagokionez. Euskarak herri-bulkada berri bat behar du eta ezkerreko independentismoak ere gogoeta estrategikoa berritzeko garaia du, ezkerreko independentismoaren arnasa, ekarpena, ere ezinbestekoa izango baita datozen urteetan. Hori dela eta, urtarrilaren 12an gogoeta-prozesu ireki bati ekingo diogu.

Elkargune eta abiapuntu bat

hezkuntza | 2018-12-14

Ezarri zaizkigun hezkuntza sistemak agortu egin dira, eta agorpen hori letra larritan nabarmendu beharra dagoela deritzogu. Segregazio sozialaren gaiak zentralitatea hartu du Erkidego Autonomoan hezkuntzari buruzko eztabaida sozialean, baina hutsuneak/arazoak ugariak eta sakonak dira, sistema oso batenak. Estatuen inboluzio demokratikoak hezkuntza jopuntuan jarri du gainera.

Gaur hezkuntzan bizi ditugun egoera konkretuak erdigunean jarriz eta ikuspegi nazionalari eutsiz, etorkizuneko hezkuntza sistema publiko eta burujaberako herri-estrategia adosteko premia du herri honek. Zentzu horretan, ezkerreko independentismoak bere gogoeta estrategikoa berritzeko garaia du. Konpromiso berriak hartzeko garaia dela deritzogu eta ausardiaz jokatzekoa.

Urtarrilaren 12an maiatzean bukatuko den prozesu bati ekingo diogu. Gogoeta prozesu publikoa izango da, ezkerreko independentismoaren ikuspegi estrategikoa berriztea helburu duena.