Pertsona libre, eskubidez berdin eta elkartasunez lotuen arteko bilera, plaza hutsean.

Euskalgintza arnasberritzeari buruzko gogoeta, urtarrilaren 22 eta 29an

| 2021-01-14

Urtarrilaren 22 eta 29ko Plaza Hutsa monografikoa izango da, eta euskalgintza arnasberritzeaz gogoeta-ariketa sakona egingo da, ikuspegi ezkertiar eta independentistatik beti ere. Eztabaida eta mahainguruetan euskalgintzaren mugimenduan erreferentziazko izenak izango dira.

Pandemia egoera dela eta, Euskararen Plaza Hutsa telematikoa izango da. Formulario hau beteta eman daiteke izena.

Euskalgintzaren baitan sei gailanduko dira modu sakonean: egoera soziolinguistikoaren azterketa, aterki ideologikoaren eraberritzea, hizkuntza-politika, euskalgintzaren eraberritzea, arnasguneak eta kulturgintza. Gai horietako bakoitza mahai-inguru banaren bidez landuko da eta horretarako, hainbat hizlari izango dira.

Duela bi urte irekitako gogoeta prozesuaren hirugarren fasea itxiko dugu horrela. Plaza Hutsa jardunaldiaren ostean gogoeta herri eta auzoetara eramango da, dokumentua behin betiko itxi aurretik. Gogoeta hori jasotzen duen dokumentuaren arabera, euskalduntze prozesuaren agorpena bizi dugu eta garaiko bulkadaren inertziak ari gara kudeatzen. Dauzkagun datuekin, eta galera-irabazien arteko erlazioa gorabehera, euskararen etorkizunak gutxieneko bermea duela esan ahal izatetik urrun gaude, baita euskarak posiziorik onena duen lurraldeetan ere.

Euskalgintzak azken hamarraldietan eginiko ibilbideari ere erreparatu zaio. Euskalgintza erakundetu egin da, azpiegitura asko sortu den bitartean, bidean lausotu egin da mugimendua.  

Horrez gain, dugun erronka handietako bat da aterki ideologikoa berritzea. Diskurtsoa berritu ahal izateko, besteak beste, hizkuntza-gatazka identitate-auzi hutsetik atera beharko litzateke. Hizkuntza-eskubideen aldeko borroka botere-harremanak eraldatzearekin lotzen da beraz, eta justizia sozialean eta demokrazian oinarritzen den beste jendarte eredu baten aldeko ekimena da.

Edonola ere, euskalduntze fase berri baterako lau ildo estrategiko proposatzen ditu dokumentuak: hizkuntza politika berri baterako adostasunak eraikitzea, mugimendu euskaltzalearen biziberritzea. Euskalgintza biziberritzeko bide berriak abiatzea, arnasguneak indartzea eta  herri-kontakizuna birsortuko duen bulkada kulturala.